الاثنين، 7 أبريل، 2008

ليه الاضراب؟؟



يا جماعة احنا لازم نعرف ان الأيام دي لو حصل فيها حاجة التاريخ كله هايتكلم عن اللى احنا عملنا وماتنساش ان شخص واحد على الفيس بوك كان سبب في كل اللى حصل يوم 6 ابريل بالك لو ان مصر كلها حاولت تعمل حاجة
"اية الفائدة من الاضراب"
او اية الحكمة من الاساس
اقولكم لو حبينا نعمل ثورة بكرة هل الناس هاتشارك و لا لأ؟؟؟
اكيد لأ ليه؟؟؟؟
اغلبيه الشعب نوعين نوع كسول و نوع خايف لو قلنا مظاهرات النوع الكسول هايقول لسه هانروح و نعمل دا كلام مالهوش لازمة و الخايف هايخاف على مستقبله و مستقبل عياله و هايقعد في البيت لأنه كمان خايف من البهدله بس في كل الاحوال النوعين نفسهم البلد تتغير ولو قامت ثورة بجد ممكن يشاركوا فيها دلوقتى احنا عايزين نجس نبض الشعب لو قلنا اعمل مظاهرة هايخاف و يكسل فبنقول خليك في البيت لو هو كسول هايفضل في بيته و يبقي اخر تمام و لو هو خايف هايفضل في بيته و في الحالتين احنا كسبانين لأننا ساعتها هانحس ان المواطن ممكن يساعد على التغيرلكن لو انه حتى يوم الاضراب ما أضربش يبقى اكيد لو قامت ثورة مش هايتحرك (يعنى لما قلتلك امشي مامشيتش لو قلتلك اجري هاتجري؟؟؟)كمان دي جس لنبض الحكومة عايزين نعرف هي ممكن تعمل اية؟؟ لأرضاء الشعب في النهاية المطلوب مصلحة البلد احنا مش عايزين ننهب ولا حاجة
=========
ملحوظات
احنا : المقصود بها المواطنين المصريين
الثورة : تعبير مجازي عن التغيير (غير مقصود بها المعنى الحرفي)
فيه فئة من الشعب يائسة من التغيير : ياريت تروح بيئسها في جنب و تسيب الناس اللى لسه عندها امل تحاول تعمل حاجة الناس الكبيرة اللى اخدت على الوضع و عاجبهم الحال و بيكسروا مقديفنا لو كانوا هما عملوا حاجة زمان --مكناش اضطرينا اننا نعمل حاجة دلوقتى (كفاية اننا اتاخرنا سنة ضوئية عن العالم)أما الفئة من الشعب اللى مستغله الوضع: لا تعليق كلنا عارفين ممكن نقولهم ايه


************************************
على فكرة موضوع المقاطعة و الجلوس في البيت يتم في الدول المتقدمة عندما ييأس الشعب من جميع المحاولات لاصلاح الوضع فيضرب في البيت فترة 10 ايام مثلا فلا تجد الحكومة احد لتحكمه و تفشل في السيطرة على الوضع مما يضطرها الى الاستقالة
طبعا لو اننا سيبنا الحكومة 100 سنة برضه مش هاتستقيل بس على الأقل هاتبدا تحاول تحترم المواطن و أدينا شايفين انه لأول مرة من 4 سنين حاجة تنقص شلن و الاسعار بدات تنزل والاضراب دا كمان شهر علشان نضغط على الحكومة أكترمستنيكم











ليست هناك تعليقات: