الثلاثاء، 8 أبريل، 2008

خراب مدينة المحلة

اللى بيحصل في المحلة دا غلط و اكبر غلط
حركة 6 ابريل استفادت اية يعنى لما ظابط و 2 عساكر ماتوا و 9 من الاهالى؟؟؟
و حرقوا في المدارس و العربيات و المحلات و دمروا تماما أكبر شارع في المحلة و دمروا القطارات
هل دا هايحرك البلد
هل لو انتا بأيدك تعمل اللى اتعمل في المحلة في بلدك اسكندرية او القاهرة هاتعمله؟؟
هاتضرب شوية عساكر في امن الدولة مايعرفوش كوز الذرة
الحركة بالكامل حركة سلمية مش عايزين مظاهرات أساسا
ماأحنا طول عمرنا بنتظاهر عملنا أية؟
وطالما أن الحركة أو البلد مش هايستفيدوا يبقى كل اللى بيحصل مالهوش لزمة
أحنا عايزين نبني مش نهدم
كمان الصور بتاعت الحرق و النهب كلهم عيال 15-18 سنة سواقين التكاتك و شوية عيال صيع و بلطجية اما الناس المحترمة كلها قاعدة في بيوتها خايفة على نفسها و على عيالها
اللى اتعمل دا ترويع للناس و شوه صورة الحركة قدام الاعلام
اللى استغل القلة دول و قال ان كل اللى في الحركة فشلة و بلطجية و ان كل غرضهم نشر الفساد
أما سبب أن المحلة هي المكان الوحيد اللى حصل فيه تظاهر فدا لأن فيها تجمع من أكبر التجمعات في مصر 25 ألف عامل في الغزل و النسيج ممكن ياكلوا الزلط (ربنا يخليهم)
و مع ذلك كلهم اتبروا من اللى بيحصل و من الناس اللى عملوه
ربنا يعدي البلد من المرحلة دي على خير

ليست هناك تعليقات: